सुशासन र समृद्धि प्राप्तिमा छठी माता र सूर्य भगवान‍्को कृपा बनिरहनेछः राष्ट्रपति पौडेल

राष्ट्रपति रामचन्द्र पौडेलले छठ पर्व २०८३ का अवसरमा शुभकामना सन्देश जारी गर्दै यस पर्वले समाजमा विद्यमान वर्गीय, जातीय, लैङ्गिकलगायत सबै प्रकारका विभेद, कुरीति र विसङ्गतिको अन्त्य गरी राष्ट्रिय एकता अभिवृद्धि गर्ने विश्वास व्यक्त गरेका छन्। मौलिक संस्कृतिको संरक्षण, संवर्द्धन र आपसी सद्भाव सुदृढ पार्न प्रेरणा दिने छठ पर्वले सूर्य देवको आराधना गर्दै सामाजिक तथा प्राकृतिक सन्तुलनको सन्देश प्रवाह गर्ने उनले उल्लेख गरेका छन्।

विधिपूर्वक व्रत बस्दा मनोवाञ्छित फल पाइने र परिवारको कल्याण हुने जनविश्वास रहेको बताउँदै राष्ट्रपति पौडेलले तराई-मधेसबाट सुरु भई हाल पहाडी र हिमाली जिल्लामा समेत यो पर्व मनाउने चलन बढ्नु खुसीको विषय भएको जनाएका छन्। अन्तमा, उनले सामाजिक विभेद अन्त्य गर्दै दिगो शान्ति, सुशासन, विकास तथा समृद्धि प्राप्तिमा छठी माता र सूर्य भगवान्को कृपा बनिरहने कामना गरेका छन्।