डमरु भनेर उठाए, वन बिरालाका छाउरा निस्केपछि फेरि खेतमै लगेर छाडे

असम । भारतको असम राज्यस्थित तेङ्गाखातमा धानखेतबाट उद्धार गरिएका तीन वटा बच्चा बाघका डमरु नभई वन बिरालाका छाउरा भएको पुष्टि भएको छ । नोभेम्बर ११ बुधबार बिहान नाकारी नियोगचुक गाउँको धानखेतमा स्थानीय बासिन्दाले तीनवटा साना जनावर देखेका थिए । पछिल्ला केही दिनदेखि गाउँ वरपर बाघ देखिएको भन्दै स्थानीय त्रसित रहेकाले उनीहरूले ती बच्चा बाघका डमरु भएको ठहर गर्दै वन विभागलाई खबर गरिएको थियो ।

सूचनापछि घटनास्थल पुगेको वन विभागको टोलीले तीनवटै बच्चाको उद्धार गरेको थियो । तर, डिब्रुगढ डिभिजनका वन अधिकारी नन्द कुमारका अनुसार घटनास्थलमा जाँच गर्दा ती बाघका डमरु नभई वन बिरालाका छाउरा भएको पुष्टि भयो । उनका अनुसार तीनवटै छाउरा स्वस्थ थिए र खेतमै खेलिरहेका थिए । उनीहरूकी आमा आसपासमै हुन सक्ने भएकाले अन्यत्र लैजाँदा आमासँग पुनर्मिलनमा बाधा पुग्न सक्ने भन्दै वन विभागले उनीहरूलाई भेटिएकै स्थानमा पुनः छाड्ने निर्णय गरेको थियो ।

पछिल्ला दिनमा गाउँ आसपास बाघको गतिविधि देखिएको खबरले स्थानीयमा त्रास बढाएको थियो । विशेषगरी बाघले बच्चा हुर्काइरहेको समयमा मानिसको गतिविधि नजिक हुँदा आमा बघिनी आक्रामक हुन सक्ने सम्भावना रहेकाले पनि वन विभागले ति बच्चाको उद्दार गर्नुपरेको थियो ।