चीनसँगको सीमामा भारतको सैन्य क्षमतामा ठुलो सुधार भएको छ : जयशंकर

भारतका विदेशमन्त्री एस. जयशंकरले चीनसँगको सीमा क्षेत्र पहिलेभन्दा बढी सक्रिय रहेको र त्यहाँ भारतको सैन्य क्षमतामा उल्लेख्य सुधार भएको दाबी गरेका छन्। नयाँ दिल्लीमा आयोजित २४औँ हिन्दुस्तान टाइम्स लिडरसिप समिटमा बोल्दै उनले गलवान उपत्यकाको घटनालाई स्मरण गर्दै सीमामा आफ्नो स्थिति कायम राख्ने र सेना तैनाथ गर्ने भारतको क्षमतामा निकै ठुलो सुधार आएको बताए।

जुन २०२० मा गलवान उपत्यकामा भारतीय र चिनियाँ सैनिकबीच भएको हिंसात्मक झडपपछि दुई देशबीचको सीमा विवाद चर्चामा रहँदै आएको छ। विदेशमन्त्री जयशंकरले सीमा सुरक्षा र सैन्य तयारीलाई सरकारले उच्च प्राथमिकतामा राखेको संकेत गरेका छन्। उनले सीमामा देखिएको सक्रियता र त्यसलाई सम्बोधन गर्न भारतले बढाएको सैन्य क्षमताले सुरक्षा व्यवस्था थप बलियो बनेको दाबी गरेका छन्।

यस विषयमा चीनको तर्फबाट भने तत्काल कुनै प्रतिक्रिया सार्वजनिक भएको छैन।