छठमा सुरक्षा योजना मजबुत बनाउन आईजीपीको निर्देशन

काठमाडौँ । प्रहरी महानिरीक्षक डा. मनोजकुमार केसीले छठ पर्वका बेला हुन सक्ने अवाञ्छित गतिविधि रोक्न सुरक्षा व्यवस्था थप मजबुत बनाउन निर्देशन दिएका छन् ।

नेपाल प्रहरी प्रधान कार्यालयबाट शनिबार भर्चुअल माध्यमबाट काठमाडौं उपत्यका प्रहरी कार्यालय र सातवटै प्रदेश प्रहरी कार्यालयका प्रमुख तथा प्रतिनिधिलाई सम्बोधन गर्दै उनले विगतका घटनाको विश्लेषण गरी सुरक्षा योजना बनाउन निर्देशन दिएका हुन् । छठ पर्वका बेला नदी, तलाउ र पोखरीका घाटमा ठुलो भिडभाड हुने भएकाले सुरक्षा व्यवस्थामा विशेष सतर्कता अपनाउन उनले निर्देशन दिए । विशिष्ट व्यक्तिहरूको सुरक्षाका लागि विशेष रणनीति बनाउन र सम्भावित घटनाप्रति सचेत रहन पनि उनले आग्रह गरे ।

उनले सुरक्षा अवस्था मूल्याङ्कन गरेर बल प्रयोग गर्दा विशेष संवेदनशीलता अपनाउन तथा प्रदेश प्रहरी प्रमुखहरूलाई आफ्नो क्षेत्रमा अनुगमन, सुपरीवेक्षण र निरीक्षण गरी सुरक्षा व्यवस्थामा देखिएका कमजोरी समयमै सुधार गर्न निर्देशन दिए । चाडपर्वपछि हुन सक्ने अवाञ्छित गतिविधिबारे सूचना सङ्कलन गरी विशेष सुरक्षा योजना बनाउनुपर्नेमा जोड दिँदै उनले सीमा नाकामा हुने आपराधिक गतिविधि र तस्करी नियन्त्रणमा शून्य सहनशीलताको नीति अपनाउन निर्देशन दिए । गैरव्यावसायिक गतिविधिमा संलग्न प्रहरी कर्मचारीलाई कानुनी दायरामा ल्याइने चेतावनी दिँदै उनले प्रहरीको कार्यसम्पादन प्रभावकारी बनाउनसमेत निर्देशन दिए ।