भारत ‘ए’ सँग नेपाल यू–१९ महिला टोली १२५ रनले पराजित

काठमाडौँ । भारत ‘ए’ महिला टोलीसँगको खेलमा नेपाली यू–१९ महिला क्रिकेट टोली १२५ रनको फराकिलो अन्तरले पराजित भएको छ । भारत ‘ए’ले दिएको २०६ रनको लक्ष्य पछ्याएको नेपालले निर्धारित २० ओभरमा ९ विकेट गुमाएर ८० रन मात्रै बनाउन सक्यो । नेपालका लागि सबित्री धामीले सर्वाधिक १९ रन बनाइन् । उनले १८ बलमा उक्त रन बनाएकी हुन् । त्यसैगरी त्रिसना विश्वकर्माले २५ बलमा १८ रन जोडिन् ।

रचना चौधरीले २३ बलमा ९ रन बनाइन् । नेपाललाई सस्तैमा समेट्ने क्रममा भारत ‘ए’ की मैत्री मनियारले उत्कृष्ट बलिङ गरिन् । उनले ३ ओभरमा ७ रन खर्चेर ४ विकेट लिइन् । महक नरवासेले ३ ओभरमा १२ रन दिँदै १ विकेट तथा नन्धना श्रीधरनले ४ ओभरमा १७ रन खर्चेर १ विकेट हात पारिन् । त्यसअघि टस जितेर पहिले ब्याटिङ गरेको भारत ‘ए’ले निर्धारित २० ओभरमा ४ विकेट गुमाएर २०५ रन बनाएको थियो । भारत ‘ए’ का लागि भविका अहिरेले सर्वाधिक ४८ रन बनाइन् ।

उनले २९ बलमा उक्त रन जोड्ने क्रममा नेपालको बलिङ आक्रमणमाथि दबाब सिर्जना गरिन् । त्यस्तै तानिष्का शर्माले १७ बलमा ३६ रन बनाउँदा निधि महतोले १७ बलमा अविजित ३५ रन जोडिन् । नेपालका लागि टिका शाहले ४ ओभरमा ३९ रन खर्चेर २ विकेट लिइन् । रचना चौधरीले ४ ओभरमा ३५ रन दिँदै १ विकेट तथा आशिका महराले ४ ओभरमा ५२ रन खर्चेर १ विकेट हात पारिन् ।