एक करोडको कारोबार गर्दै ‘चौथो तिहार फ्लोरा एक्स्पो २०८३’ सम्पन्न

नर्सरी व्यवसायी संघ नेपालले कार्तिक १७ गतेदेखि २१ गतेसम्म काठमाडौंको भृकुटीमण्डपमा आयोजना गरेको 'चौथो तिहार फ्लोरा एक्स्पो २०८३' शनिबार सम्पन्न भएको छ। उक्त एक्स्पोमा १ करोडको कारोबारसँगै ३५ हजार बढीले अवलोकन गरेको मेला संयोजक तथा संघको उपाध्यक्ष लक्ष्मी महर्जनले जानकारी दिइन्। एक्स्पोमा अपेक्षा गरे अनुसार अवलोकन गरिएकाले नर्सरी व्यवसायीहरूमा थप उत्साह थपिएको संयोजक महर्जनले बताइन्।

एक्स्पोमा ६३ वटा व्यवसायिक स्टललगायत वनस्पति विभाग, पुष्प विकास केन्द्रसहितको अफिसियल ६ वटा स्टल तथा प्रतिस्पर्धाको ४ वटा स्टल समेत गरी जम्मा ७३ वटा स्टल रहेको थियो। एक्स्पोमा विभिन्न प्रजातिका फूल फुल्ने तथा नफुल्ने आलंकारिक फूल बिरुवाहरूलगायत कृषि तथा वन, जडिबुटी नर्सरी, फलफूल नर्सरीबाट उत्पादित विभिन्न प्रजातिका बोट बिरुवाहरू प्रदर्शनी तथा बिक्री र वितरणको लागि राखिएको थियो। एक्स्पोको प्रवर्द्धन पुष्प विकास केन्द्र र वनस्पति विभागले गरेको थियो।

नर्सरी व्यवसायी संघले तिहार लक्षित 'तिहार फ्लोरा एक्स्पो' र चैतमा 'नेसनल हर्टिकल्चर एक्स्पो' गरी वर्षमा २ वटा मेला नेपाली उत्पादन प्रवर्द्धनका लागि गर्दै आएको छ।