छठको तयारी: गुह्येश्वरीबाट गौरीघाटसम्मको वाग्मती सफाइ

काठमाडौँ । छठ पर्वको मुख्य दिनको तयारीका लागि गुह्येश्वरीबाट गौरीघाटसम्मको वाग्मती नदी एवं किनार आसपास क्षेत्र सफाइ गरिएको छ । छठ पूजा समिति गुह्येश्वरीले छठ घाट निर्माण अन्तिम चरणमा पुर्याएका बेला राष्ट्रको लागि हप्ताको दुई घण्टा स्वयंसेवा भन्ने नाराका साथ सुरु भएको वाग्मती सफाइ महाअभियानले आज त्यस क्षेत्रमा सफाइ गरेको हो ।

छठ पर्वको तयारीका लागि गरिएको सफाइबाट नकुहिने फोहर लगभग दुई मेट्रिक टन उठाइएको अभियानकर्मी किशोरसिंह शाहीले राससलाई जानकारी दिए । त्यस क्षेत्रबाट उठाइएको फोहर काठमाडौँ महानगरपालिका वातावरण विभाग टेकुको ट्रकमा राखी व्यवस्थापन गरिएको छ । कुहिने फोहर नदीको किनारमा खाल्डो खनी व्यवस्थापन गरिएको पनि उनले सुनाए ।

आजको सरसफाइ कार्यक्रममा पूर्व मुख्यसचिव एवं प्रमुख सफाइ अभियानकर्मी लीलामणि पौड्याल, महानगरपालिका वडा न ९ का वडासदस्य टेकराज अधिकारी, छठ समिति गुह्येश्वरीका पदाधिकारी एवं सदस्यहरूलगायत सफाइ अभियानकर्मी, स्थानीयवासी र भक्तजनको सक्रियता रहेको थियो । अर्को हप्ता शनिबारको वाग्मती सरसफाइ पनि गुह्येश्वरी मन्दिर अगाडि (फलामे झोलुङ्गे पुलवारि) गरिने सफाइ महाअभियानले जनाएको छ । विसं २०७० जेठ ५ गतेदेखि सुरु भएको वाग्मती सफाइ महाअभियानले आज ७०५औँ हप्ता पूरा गरेको छ ।