एनपीएलको शीर्ष २ मा पुग्ने होड, सुदूरपश्चिम र लुम्बिनीसँगै काठमाडाैँको पनि संभावना

नेपाल प्रिमियर लिग (एनपीएल) सिजन ३ मा शीर्ष २ मा पर्दै क्वालिफायर १ खेल्ने होडमा सुदूरपश्चिम रोयल्स, लुम्बिनी लायन्स र काठमाडाैँ गोर्खाज मुख्य दाबेदार देखिएका छन्। १० अंकसहित शीर्ष स्थानमा रहेको सुदूरपश्चिमको स्थान लगभग पक्का छ, तर लुम्बिनी र काठमाडाैँले आफ्ना अन्तिम खेल जितेमा समीकरण फेरिन सक्छ। लुम्बिनीले शनिबार विराटनगरलाई हराएमा ११ अंकसहित शीर्ष स्थानमा रहनेछ।

यता, काठमाडाैँले आइतबार पोखरालाई हराएमा १० अंक पुग्नेछ र राम्रो नेट रन रेटका कारण शीर्ष २ मा पर्न सक्नेछ। चितवन राइनोजको पनि गणितीय सम्भावना रहे पनि त्यो निकै कठिन छ। क्वालिफायर १ को विजेता सोझै फाइनल पुग्नेछ भने पराजित टोलीले क्वालिफायर २ खेल्ने अवसर पाउनेछ।

बुधबार हुने इलिमिनेटरमा तेस्रो र चौथो स्थानका टोलीबीच प्रतिस्पर्धा हुनेछ, जसको विजेताले क्वालिफायर २ मा स्थान बनाउनेछ।