ताइवानसँग चिनियाँ राष्ट्रपतिको आह्वान- शान्तिपूर्ण एकीकरण

बिहीबार बेइजिङमा चिनियाँ क्रान्तिकारी नेता डा. सन यात–सेनको १६० औँ जन्मजयन्ती समारोहमा सम्बोधन गर्दै सीले ‘इतिहासको प्रवाहलाई कसैले रोक्न नसक्ने’ भन्दै शान्तिपूर्ण एकीकरणमा आउन तइवानसँग आह्वान गरेका हुन् । सम्बोधन क्रममा सीले सैन्य बल प्रयोगबारे भने कुनै प्रत्यक्ष कुरा निकालेनन् । बिहीबारको सम्बोधनका क्रममा सीले ‘एक देश, दुई प्रणाली’ को स्वायत्तता मोडेललाई फेरि अघि सारे ।

यद्यपि बेइजिङले अघि सार्दैआएको यो प्रस्तावलाई ताइवानका कुनै पनि प्रमुख राजनीतिक दलले समर्थन गरेका छैनन् । यता सीले ताइवानसँगको एकीकरण चीनका लागि ‘अटल ऐतिहासिक मिसन’ भएको बताएका छन् । ‘इतिहासको प्रवाहलाई रोक्न सकिँदैन । मातृभूमिको पूर्ण पुनःएकीकरण हुनैपर्छ, र यो निश्चित रूपमा पूरा हुनेछ’, सीले भने ।

सीले चीन ‘शान्तिपूर्ण एकीकरण’प्रति प्रतिबद्ध रहेको पनि बताए । ‘ताइवान जलमार्गका दुवै किनार एउटै देश हुन् भन्ने एक चीन सिद्धान्तलाई कायम राख्दै ताइवानसँग वार्ता गर्न बेइजिङ तयार छ,’ उनले भने । ताइवानको मुख्यभूमि मामिला परिषद् (मेनल्यान्ड अफेयर्स काउन्सिल) ले न त सरकार न त ताइवानका जनताले नै ‘एक देश, दुई प्रणाली’ स्वीकार गर्नसक्ने बताएको छ । सीको अभिव्यक्ति स्वीकार गर्नु अन्ततः चिनियाँ कम्युनिस्ट पार्टीको अधिनायकवादी शासनसामु आत्मसमर्पण गर्नुसरह हुने उनको प्रतिक्रिया छ ।