बुकर जित्ने सबैभन्दा ज्येष्ठ लेखक ह्यारिसन भन्छन्, ‘मलाई अझै २६ वर्षको महसुस हुन्छ’

बेलायती लेखक एम जोन ह्यारिसन ८१ वर्षको उमेरमा बुकर पुरस्कार जित्ने अहिलेसम्मकै सबैभन्दा ज्येष्ठ लेखक बनेका छन् । सन् २०२६ को बुकर पुरस्कार जितेपछि उनले आफ्नो उमेरलाई लिएर अनौठो अनुभूति भइरहेको बताएका छन् । ‘मलाई अझै २६ वर्षको महसुस हुन्छ,’ उनले भनेका छन् । डिस्टोपियन व्यङ्ग्य उपन्यास ‘द एन्ड अफ एभ्रिथिङः द सर्पेन्ट्स टेल’ का लागि ह्यारिसनले यस वर्षको बुकर पुरस्कार जितेका हुन् । यो उनको १३औँ उपन्यास हो ।

पुरस्कारका लागि पहिलोपटक मनोनयनमा परेका उनले ५० हजार पाउन्ड राशिको पुरस्कार जितेका हुन् । स्वतन्त्र प्रकाशन गृहबाट प्रकाशित पुस्तकले बुकर जितेको पनि यो पहिलोपटक हो । ह्यारिसनको उपन्यासलाई विज्ञानकथाका रूपमा पनि चर्चा गरिएको छ । तर, उनी आफूलाई कुनै निश्चित विधामा सीमित राख्न चाहँदैनन् । लेखनलाई विधागत वर्गीकरणमा बाँध्नु लेखकका लागि साँघुरो पोसाक लगाउनुसरह भएको उनको भनाइ छ ।

गत सोमबार, नोभेम्बर १० मा पुरस्कार घोषणा भएपछि कस्तो महसुस गर्नुभयो भन्ने प्रश्नमा ह्यारिसनले भने, ‘त्यहाँ कुनै विचारभन्दा पनि अत्यन्तै डरको अनुभूति थियो । मैले पुरस्कार जित्छु भन्ने अपेक्षा गरेको थिइनँ । त्यसपछि करिब दुई मिनेटसम्म म चरम त्रासको अवस्थामा रहेँ । ’ पुरस्कार घोषणाको भोलिपल्ट भने उनी केही सम्हालिएका थिए ।