बिग बोसमा रुवाबासी, साथीका लागि ‘लाइफलाइन’ त्यागेपछि भावुक बने प्रतियोगी

बिग बोसको घरमा आफ्नै अस्तित्व जोगाउन अरूलाई पछि पार्नुपर्ने हुन्छ । खेल जित्न कतिपयले मित्रता बिर्सिन्छन्, त कतिपयले सम्बन्धलाई नै रणनीति बनाउँछन् । ‘बिग बोस २०’ को पछिल्लो एपिसोडमा त्यस्तै दृश्य देखियो । आफ्नो खेल बलियो बनाउन प्रयोग गर्न सकिने लाइफलाइनसमेत केही प्रतियोगीले साथीका लागि त्यागे । बदलामा उनीहरूले कुनै पुरस्कार पाएनन्, न त खेलमा कुनै निश्चित लाभ नै ।

तर, साथीको परिवारबाट आएको सन्देश सुन्न पाउने खुसी उनीहरूका लागि आफ्नो खेलभन्दा ठूलो बन्यो । यही क्रममा गुल्लूले कनिका मानका लागि आफ्नो लाइफलाइन त्यागे । गुल्लूको निर्णय र त्यसपछिको कुराले कनिकालाई यति भावुक बनायो कि उनी आँसु रोक्नै नसक्ने अवस्थामा पुगिन् । बिग बोसले घरका सबै प्रतियोगीलाई गार्डेन एरियामा बोलाएर परिवारका तर्फबाट विशेष अडियो सन्देश आएको जानकारी दिए । तर, त्यो सन्देश सुन्न पाउनु त्यति सजिलो थिएन ।

प्रतियोगीले आफ्नो परिवारको सन्देश सुन्ने अवसर पाउन अर्को प्रतियोगीले आफ्नो अतिरिक्त लाइफलाइन त्याग्नुपर्ने अवस्था थियो । अर्थात्, साथीलाई परिवारको सन्देश सुन्न दिने कि आफ्नै खेल बलियो बनाउने भन्ने निर्णय उनीहरूकै हातमा थियो । मनीषसँग आफ्नो खेलका लागि अतिरिक्त लाइफलाइन रोज्ने वा काजीलाई परिवारको सन्देश सुन्न दिने विकल्प थियो । मनीषले दोस्रो विकल्प रोजे ।