मेलानिया ट्रम्पलाई युक्रेनको सर्वोच्च पदक प्रदान

युक्रेनको दक्षिणी खेरसोन क्षेत्रको रुसको कब्जामा रहेको ओलेस्की सहरबाट सयौँ मानिसलाई बाहिर निकाल्न दिइएको युद्धविराम सकिएपछि यो सम्मान दिइएको हो। १९ कात्तिक, काठमाडौं । युक्रेनका राष्ट्रपति भोलोदिमिर जेलेन्स्कीले अमेरिकी प्रथम महिला मेलानिया ट्रम्पलाई देशको सर्वोच्च पदक प्रदान गरेका छन्।

बिबिसीका अनुसार, युक्रेनलाई मानवीय सहयोगमा पुर्‍याएको ‘महत्त्वपूर्ण व्यक्तिगत योगदान’का लागि मेलानिया ट्रम्पले ‘अर्डर अफ प्रिन्सेस ओल्गा, फर्स्ट क्लास’ पदक पाएकी छिन्। युक्रेनको दक्षिणी खेरसोन क्षेत्रको रुसको कब्जामा रहेको ओलेस्की सहरबाट सयौँ मानिसलाई बाहिर निकाल्न दिइएको युद्धविराम सकिएपछि यो सम्मान दिइएको हो। उद्धार मिसनमा खटिएका ओम्बुड्सम्यानहरू र वरिष्ठ अधिकारीहरूसहितको रुसी र युक्रेनी प्रतिनिधिमण्डलले बिहीबार ट्रम्पको निमन्त्रणामा ह्वाइट हाउसमा भेटघाट गर्ने अपेक्षा गरिएको छ।

ह्वाइट हाउसका अनुसार मेलानिया ट्रम्पले दुई युद्धरत देशहरूबीच स्वतन्त्र रूपमा वार्ता सुरु गराएर सफलतापूर्वक युद्धविराम गराएकी छिन्। युद्धविराम गराउन सहयोग गरेकोमा रुसी र युक्रेनी अधिकारीहरूले मेलानिया ट्रम्पलाई पटक-पटक धन्यवाद दिएका छन्। तर दुवै पक्षले यसमा उनको संलग्नताको प्रकृति वा सीमाबारे विस्तृत विवरण भने दिएका छैनन्।