बसमा यात्रारत युवतीमाथि दुर्व्यवहार गरेको भिडियो भाइरल, तीन जना पक्राउ

काठमाडौंबाट महेन्द्रनगर आउँदै गरेको यात्रुबाहक बसभित्र महिला यात्रुमाथि दुर्व्यवहार गरेको भिडियो भाइरल भएपछि कञ्चनपुर प्रहरीले तीन जनालाई पक्राउ गरेको छ । १९ कात्तिक, धनगढी । काठमाडौंबाट महेन्द्रनगर आउँदै गरेको यात्रुबाहक बसभित्र महिला यात्रुमाथि दुर्व्यवहार गरेको भिडियो भाइरल भएपछि कञ्चनपुर प्रहरीले तीन जनालाई पक्राउ गरेको छ ।

पक्राउ पर्नेमा भीमदत्त नगरपालिका–९ का समीर बिष्ट, अनिल नाथ योगी र भीमदत्त नगरपालिका–३ तिलकेनीका जीवन बम रहेको जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक (डीएसपी) टेकबहादुर रावतले जानकारी दिए । उनका अनुसार १७ कात्तिकमा काठमाडौंबाट महेन्द्रनगर आउने क्रममा आफूमाथि दुर्व्यवहार गरेको भन्दै कञ्चनपुरकी एक युवतीले निवेदन दिएपछि उनीहरूलाई पक्राउ गरिएको हो । प्रहरीकाअनुसार महाकाली यातायातको सुुपप्र ०२–००१ ख १५६५ नम्बरको बसमा जडान गरिएको सीसीटीभी क्यामेरामा कैद भएको भिडियो सामाजिक सञ्जालमा भाइरल भएपछि चासो बढेको थियो ।

भिडियो सार्वजनिक हुनुअघि सोही राति बसमा सवार यात्रुहरूले वडा प्रहरी कार्यालय बुटवलको जिम्मा लगाएका थिए । इलाका प्रहरी कार्यालय बुटवलका प्रमुख डीएसपी निशान्त श्रीवास्तवका अनुसार महिलामाथि दुव्र्यवहार भएको सूचना पाएपछि वडा प्रहरी कार्यालयको टोलीले मध्यरातमा बुटवल चौराहबाट उनीहरूलाई नियन्त्रणमा लिएको थियो ।