५६ वर्षको उमेरमा पनि उत्तिकै फिट सैफ

बलिउड अभिनेता सैफ अली खानले हालै इन्स्टाग्राममा आफ्नो नयाँ भिडियो सार्वजनिक गरेका छन् । उक्त भिडियोमा ५६ वर्षीय सैफ शर्ट नलगाई योग गरिरहेको देखिएका छन् । खुला आकाशमुनि उनले सूर्य नमस्कार गरेको भिडियोले सामाजिक सञ्जालमा चर्चा पाएको छ ।

सैफको यो भिडियोको करिना कपुरदेखि शिल्पा शेट्टीसम्मले प्रशंसा गरेका छन् । भिडियोमा उनको शारीरिक तन्दुरुस्ती स्पष्ट देखिन्छ । भिडियो सार्वजनिक गर्दै सैफले आफ्नो दैनिक दिनचर्यालाई नयाँ ढङ्गले व्यवस्थित गर्ने प्रयासबारे पनि बताएका छन् ।

पहाडको फेदीमा रहेको खुला तथा प्राकृतिक वातावरणमा उनले योग अभ्यास गरेको देख्न सकिन्छ । सैफ आफ्नो शरीरलाई फिट राख्न नियमित र अनुशासित दिनचर्यामा ध्यान दिन्छन् । उनी भारी तौल उठाएर गरिने व्यायामभन्दा योग, शरीरको लचकता, सन्तुलन र कार्यक्षमता बढाउने अभ्यासलाई प्राथमिकता दिन्छन् ।