डेनमार्कमा होटल म्यानेजरको जागिर छाडे, पोर्चुगलमा गर्दैछन् आफ्नै व्यवसाय

धेरै नेपालीहरू पोर्चुगलमा आवासीय अनुमति पाएपछि राम्रो कमाइ र सुविधाको खोजीमा डेनमार्क जस्ता विकसित मुलुकतर्फ लाग्ने गर्छन्। तर, डेनमार्कको चारतारे होटलमा नाइट सिफ्ट म्यानेजरको राम्रो जागिर छाडेर निराजन चार वर्षअघि पोर्चुगल फर्किए। सन् २०१५ मा विद्यार्थी भिसामा डेनमार्क गएका उनले त्यहाँ अर्थशास्त्रमा स्नातकोत्तर गरे र संघर्ष गर्दै म्यानेजर पदसम्म पुगेका थिए।

डेनमार्कको चिसो मौसम, झन्झटिलो प्रशासनिक प्रक्रिया र उच्च खर्चका कारण आफूलाई त्यहाँ लामो समय बस्न उपयुक्त नलागेको उनले बताए। पोर्चुगलमा व्यवसाय सुरू गर्न तुलनात्मक रूपमा सजिलो भएको अनुभव सुनाउँदै उनले हाल ट्राभल एजेन्सी सञ्चालन गरिरहेका छन्। उनी नेपालबाट पोर्चुगल जाने यात्रुका लागि टिकट र भ्रमण प्याकेजको व्यवस्था गर्छन्।

व्यवसायमा प्रतिस्पर्धा भए पनि आफ्नो रुचि र क्षमता अनुसार काम गर्न सके पोर्चुगलमा सम्भावना रहेको उनको बुझाइ छ। उनले छोराछोरीको भविष्य र पारिवारिक समयलाई प्राथमिकता दिँदै आफ्नो व्यवसायलाई निरन्तरता दिइरहेका छन्।