प्रहरी अहिले मार खाने र हेरेर बस्ने गरी दुई भागमा बाँडिएको छ : ओली

नेकपा (एमाले) का अध्यक्ष केपी शर्मा ओलीले नेपाल प्रहरी सङ्गठन अहिले सरकारबाट मार खाने र हेरेर बस्ने गरी दुई भागमा विभाजित भएको टिप्पणी गरेका छन्। बागमती प्रदेश कमिटीको बैठकलाई सम्बोधन गर्दै उनले सरकारले प्रहरीमाथि अनावश्यक राजनीतिक हस्तक्षेप गरेको र यसबाट प्रहरी, कर्मचारीतन्त्र तथा व्यवसायीहरू असन्तुष्ट रहेको दाबी गरे।

आफूलाई सरकार बनेकै दिन पक्राउ गरेर प्रतिशोध साँधिएको आरोप लगाउँदै उनले एमाले नेता-कार्यकर्तामाथि प्रहरीले निर्मम बल प्रयोग गरेको बताए। ओलीले सरकार र बिचौलियाको सम्बन्धमाथि प्रश्न उठाउँदै व्यवसायीलाई सम्पत्ति शुद्धीकरणका नाममा तर्साइएको जिकिर गरे।

उनले पार्टीको प्रभाव पुनः स्थापित गर्न कार्यकर्तालाई आन्दोलन र निर्वाचनको तयारीमा जुट्न निर्देशन दिँदै बागमती प्रदेशमा पार्टी सङ्गठनलाई बलियो बनाउन युवाहरूलाई सक्रिय रूपमा परिचालन गर्नुपर्नेमा जोड दिए। उनले जनतालाई राजनीतिक नेतृत्वको पृष्ठभूमि मूल्याङ्कन गर्न सिकाउनु कार्यकर्ताको दायित्व भएको बताए।