विवादास्पद छविका अभिषेक गिरी सम्पर्कविहीन भएपछि घरमा टाँसियो प्रहरीको पत्र

सम्पत्ति शुद्धीकरणसम्बन्धी मुद्दामा बयानका लागि बोलाउँदा नआएपछि मोरङ प्रहरीले गत १९ कात्तिकमा गिरीलाई हुलाकमार्फत पत्र काटेको थियो । तर प्रहरीले पक्राउ गर्ने सूचना पाएपछि गिरी फरार छन् । २८ कात्तिक, विराटनगर । सम्पत्ति शुद्धीकरण कसुरको आरोपमा अनुसन्धानका लागि प्रहरीले बोलाउँदा नआएपछि प्रहरीले विवादास्पद छविका अभिषेक गिरीको घरमा सूचना टाँसेको छ ।

जिल्ला प्रहरी कार्यालय मोरङले बयानका लागि आउन भन्दै हुलाकमार्फत पठाएको पत्र बुझ्ने नभेटेपछि घरको भित्तामा सूचना टाँसिएको हो । सम्पत्ति शुद्धीकरणसम्बन्धी मुद्दामा बयानका लागि बोलाउँदा नआएपछि मोरङ प्रहरीले गत १९ कात्तिकमा गिरीलाई हुलाकमार्फत पत्र काटेको थियो । तर प्रहरीले पक्राउ गर्ने सूचना पाएपछि गिरी फरार छन् । प्रहरीले काटेको पत्रमा आफ्नो दसीप्रमाण तथा आवश्यक कागजातसहित सात दिनभित्र उपस्थित हुन अनुरोध भनिएको छ ।

पत्र काटेको सात दिन बित्दा पनि उनी सम्पर्कमा नआएपछि कानुनी प्रक्रियाको दोस्रो चरणअन्तर्गत घरमा सूचना टाँस गरेको हो । आपराधिक लाभ लिई संगठित अपराध गरेको आरोप लागेका गिरीविरुद्ध अहिले प्रहरीले सम्पत्ति शुद्धीकरणसम्बन्धी मुद्दाको अनुसन्धान गरिरहेको छ । तर, उनी गत असोजदेखि भारत गएर बसेकाे प्रहरी स्राेतकाे दाबी छ ।