चार दिनमै ५०७ करोड कमायो ‘रामायणः पार्ट–१’ले, बन्यो वर्षकै तेस्रो सर्वाधिक कमाउने फिल्म

नितेश तिवारीको निर्देशनमा बनेको फिल्म ‘रामायणः पार्ट–१’ले प्रदर्शनको चार दिनमै विश्वभरबाट ५०० करोड भारुभन्दा बढी कमाइ गरेको छ । प्रदर्शनको सुरुवाती दिनदेखि नै बक्स अफिसमा आक्रामक देखिएको फिल्मले चौथो दिनसम्म आइपुग्दा ५०७ करोड २० लाख भारु कमाएको हो । यो कमाइसँगै फिल्म सन् २०२६ मा सर्वाधिक कमाउने भारतीय फिल्मको सूचीमा चौथो स्थानमा पुगेको छ । त्यस्तै, हिन्दी फिल्मको सूचीमा भने तेस्रो स्थानमा छ । कलेक्सन ट्र्याक गर्ने वेबसाइट स्याकनिल्कका अनुसार फिल्मले भारतमा मात्रै चार दिनमा २५२ करोड ७८ लाख भारु नेट कलेक्सन गरेको छ ।

भारतमा यसको ग्रस कलेक्सन ३०१ करोड ६४ लाख भारु पुगेको छ । विदेशको कमाइसमेत जोड्दा विश्वव्यापी ग्रस कलेक्सन ५०७ करोड २० लाख भारु पुगेको हो । छिटो ५०० करोड कमाउने फिल्मको सूचीमा ‘पुष्पाः द रुल’ र ‘बाहुबली–२’ पनि छन् । यी फिल्मले पनि बक्स अफिसमा निकै तीव्र गतिमा कमाइ गरेका थिए । चार दिनको कमाइसँगै ‘रामायणः पार्ट–१’ यस वर्ष सर्वाधिक कमाउने हिन्दी फिल्ममध्ये तेस्रो स्थानमा पुगेको छ ।

अब यसको नजर दोस्रो स्थानमा रहेको अजय देवगन अभिनीत फिल्म ‘दृश्यम–३’को रेकर्डमा छ । ‘दृश्यम–३’ले विश्वव्यापी रूपमा ५७४ करोड भारु कमाएको बताइएको छ । अहिलेको कमाइको गति कायम राख्न सके ‘रामायणः पार्ट–१’ले केही दिनमै यो आँकडा पार गर्न सक्छ ।