घोप्टेभिरमा खस्यो झन् ठूलो पहिरो, पृथ्वी राजमार्ग दुईतर्फी नै अवरुद्ध

पृथ्वी राजमार्गअन्तर्गत चितवनको इच्छाकामना गाँउपालिका-४ घोप्टेभिर नजिकै खसेको पहिरो पन्छाउन ३ वटा मेसिन परिचालन गरिएको छ। सोमबार बिहान करिब ५ बजे सुक्खा पहिरो खस्दा पृथ्वी राजमार्ग दुईतर्फी नै पूर्ण रूपमा अवरुद्ध भएको नागढुंगा-मुग्लिङ सडक आयोजनाले जनाएको छ।

पहिरो ठूलो भएकाले थप दुईवटा मेसिन परिचालन गरेर पहिरो पन्छाउने तयारी भइरहेको नागढुंगा-मुग्लिङ सडक योजना पश्चिम खण्डका इन्जिनियर सचिन्द्र मिश्रले जानकारी दिए। 'थप पहिरो नआएको खण्डमा अबको करिब ३ घण्टाभित्र उक्त पहिरो हटाएर यातायात सञ्चालन गर्न सकिने अवस्था छ,' मिश्रले भने।

सोमबार दिउँसो १ बजेअघि उक्त पहिरो पन्छाउने अवस्था नरहेको उनले बताए।