दिवालीमा सैफको पुर्ख्यौली गहना लगाउँदा विवादमा करिना, कांग्रेस नेताले पठाए कानुनी पत्र

बलिउड अभिनेत्री करिना कपूर खानले दिवालीमा लगाएको एउटा गहना अहिले विवादित बनेको छ । न त त्यो सामान्य गहना हो, न त यसको इतिहास नै सामान्य छ । ३० क्यारेटको पन्ना जडित उक्त पेन्डेन्टमा पवित्र कुरानको आयत कुँदिएको छ । यही पेन्डेन्ट दिवालीको अवसरमा लगाएपछि करीना विवादमा तानिएकी हुन् । यस विषयलाई लिएर कांग्रेस नेता अब्बास हफिजले करीनालाई कानुनी नोटिस पठाएका छन् ।

मुस्लिम समुदायका केही व्यक्तिले पनि उनको पहिरनप्रति आपत्ति समेत जनाएका छन् । करिनाले सामाजिक सञ्जालमा दिवाली सेलिब्रेसनका केही तस्वीर सार्वजनिक गरेकी थिइन् । तस्वीरमा उनी डिजाइनर पुनीत बलानाले तयार पारेको बेज रंगको कफ्तान र सुहाँउदो पगडीमा देखिएकी छिन् । उक्त पेन्डेन्टमा पवित्र कुरानको आयत ‘आयतुल कुर्सी’ कुँदिएको छ । यो कुरानको दोस्रो अध्याय ‘सूरह अल–बकरा’ को २५५औँ आयत हो ।

मुस्लिम समुदायका केही व्यक्तिको आपत्ति के छ भने कुरानको पवित्र आयत अंकित गहना हिन्दू धर्मको पर्व दिवाली मनाउने क्रममा लगाउनु धार्मिक मर्यादाविपरीत हो । यही विषयमा कांग्रेस नेता अब्बास हफिजले करिनालाई कानुनी पत्र पठाएका हुन् । हफिजले पनि कुरानको पवित्र आयत अंकित पेन्डेन्ट दिवालीमा लगाएको भन्दै आपत्ति जनाएका छन् । उनले यसलाई कुरानको अपमान भएको दाबी गर्दै करीनालाई पत्र पठाएका हुन् । पत्रमार्फत उनले सामाजिक सञ्जालबाट पेन्डेन्ट लगाएको तस्बिर हटाउनसमेत निर्देशन दिएका छन् ।