पोखरा एभेन्जर्सको ‘सेन्चुरी क्लब’, चारमध्ये तीन शतक पोखराकै खेलाडीको नाममा

एनपीएलको तेस्रो संस्करण चलिरहँदा हरेक सिजन शतक हान्ने खेलाडी पोखरा एभेन्जर्सकै छन् । एनपीएल इतिहासमा प्रहार भएका चार शतकमध्ये तीन शतक पोखरा एभेन्जर्सका खेलाडीले बनाएका छन् । २३ कात्तिक, काठमाडौं । नेपाल प्रिमियर लिग (एनपीएल) मा शतक जब प्रहार गर्ने खेलाडीको नाम आउँछ त्यसमा सबैभन्दा अगाडि आउने टिम पोखरा एभेन्जर्स हो । एनपीएलमा पोखरा एभेन्जर्सले एउटा विशेष कीर्तिमान बनाएको छ ।

एनपीएलको तेस्रो संस्करण चलिरहँदा हरेक सिजन शतक हान्ने खेलाडी पोखरा एभेन्जर्सकै छन् । एनपीएल इतिहासमा प्रहार भएका चार शतकमध्ये तीन शतक पोखरा एभेन्जर्सका खेलाडीले बनाएका छन् । अहिले भइरहेको एनपीएलको तेस्रो सिजनमा पोखराले सुरुवाती चार खेलमा लगातार हार बेहोरेको थियो । तर सोमबार कर्णाली याक्सविरुद्ध पोखरा एभेन्जर्सका क्यानडेली ओपनर युवराज सिंह सम्राले शतक प्रहार गर्दै पोखरालाई यस सिजनको पहिलो जित दिलाउन मद्दत गरे । साथै उनी एनपीएलको सेन्चुरी क्लब समावेश हुने पोखरा एभेन्जर्सको तेस्रो र समग्रमा चौथो खेलाडी बने ।

एनपीएलको तेस्रो सिजनमा पहिलो शतक प्रहार गर्ने क्रममा सम्राले ४५ बलमा शतक पूरा गरे । उनले ४८ बलमा १० चौका र ६ छक्कासहित १०२ रन बनाए । उनको आक्रामक ब्याटिङ मद्दतमा पोखराले २० ओभरमा ३ विकेट गुमाएर २१७ रन बनाएको थियो । यस सिजन २०० रन कटाउने पनि पोखरा पहिलो टोली बन्यो ।