पिसाब चुहिने समस्या लुकाएर बिताइन् २५ वर्ष, उपचारपछि फर्कियो प्रमिलाको आत्मविश्वास

२५ वर्षसम्म पिसाब चुहिने समस्याको सङ्कोच र मानसिक बोझ खेपेकी ५३ वर्षीया प्रमिला जोशीले ‘मिनिस्लिङ’ शल्यक्रियापछि आफ्नो आत्मविश्वास मात्र फर्काइनन्, परिवारको खुसीमा आफ्नै स्वास्थ्य बेवास्ता गर्ने महिलाहरूको यथार्थलाई पनि उजागर गरिन् । बनेपा–५ की ५३ वर्षीया प्रमिला जोशी धुलिखेल अस्पतालको स्त्रीरोग वार्डमा शल्यक्रियापछिको स्वास्थ्यलाभ गरिरहेकी थिइन् । उनको हातमा नसा हुँदै दिइने तरल पदार्थ (आईभी फ्लुइड) जोडिएको थियो । अस्पतालको शय्यामा बसेर उनी आफ्नी २५ वर्षीया छोरीसँग कुराकानी गरिरहेकी थिइन्।

छोरीलाई खाजा खाइन् कि खाइनन् भनेर सोध्दै गरेकी प्रमिलाको अनुहारमा बिरामी अवस्थामै पनि सन्तानप्रतिको माया र चिन्ता प्रष्ट देखिन्थ्यो । आफू उपचाररत हुँदा पनि छोरीको खानपानबारे चासो राखिरहेकी उनलाई देख्दा मनमा एउटा प्रश्न उब्जियो, आफ्नो पीडा र असहजताबीच पनि परिवारको खुसीलाई प्राथमिकता दिन अभ्यस्त महिलाहरूले आफ्नै स्वास्थ्यका लागि कति समय निकाल्न पाउँछन् ? यही प्रश्नले मलाई उनीसँग कुराकानी गर्न प्रेरित गर्‍यो । ‘अहिले कस्तो महसुस भइरहेको छ ?

के समस्याका कारण शल्यक्रिया गर्नुपरेको हो ?,’ मैले सोधेँ। कुराकानीकै क्रममा झन्डै २५ मिनेट बितिसकेको पत्तै भएन । अस्पतालको उक्त वार्डमा शल्यक्रियापछि डिस्चार्जको प्रतीक्षामा रहेका बिरामीहरूलाई राखिने भएकाले पनि उनीसँग खुलेर कुराकानी गर्ने अवसर मिल्यो ।