सुनार टोलमा सामुहिक तिहार : दक्षिणा, कोसेली र खर्च पनि बराबरी

धनकुटा : धनकुटाको पाख्रीबास नगरपालिका–७ मुगास्थित सुनार टोलका बासिन्दाले विगत १० वर्षदेखि सामूहिक रूपमा तिहार मनाउँदै आएका छन्। परिवार र आफन्तबीच सीमित हुँदै गएको तिहारलाई सामूहिक उत्सवका रूपमा मनाउने यो परम्परा स्थानीय नगेन्द्र गहतराजको पहलमा सुरु भएको हो। दाजुभाइ तथा दिदीबहिनीबीचको सम्बन्ध आत्मीय र प्रगाढ बनाइराख्ने उद्देश्यले सामूहिक रूपमा तिहार मनाउने चलन सुरु गरिएको गहतराजले बताए। टोलमा रहेको सानो सामुदायिक घर सामूहिक तिहार मनाउने साझा थलो बनेको छ।

यस टोलमा तिहार मनाउँदा लाग्ने खर्च सबै घरपरिवारले बराबरी बाँड्ने गरेका छन्। दिदीबहिनीले पनि सबै दाजुभाइलाई एउटै प्रकारका कोसेली दिने चलन छ। भाइटीकामा दिदीबहिनीले दक्षिणा पनि व्यक्तिगत रूपमा नराखी बराबरी बाँड्ने गरेका छन्। कसैले बढी र कसैले कम पाउने अवस्था अन्त्य गरी सबै परिवारबीच समानता र आत्मीयता कायम गर्ने उद्देश्यले यस्तो अभ्यास गरिएको गहतराजले बताए।

सामाजिक तथा राजनीतिक गतिविधिमा समेत सक्रिय सुनार टोलबाट बहुदलीय व्यवस्था पुनःस्थापनापछि दुई जना स्थानीय वडाध्यक्ष बनिसकेका छन्। व्यक्तिगत रूपमा मनाइने चाडलाई सामूहिक उत्सवमा रूपान्तरण गर्दै आएको सुनार टोलका बासिन्दाले तिहार टीका र दक्षिणामा मात्र सीमित नभई आपसी सम्बन्ध, सद्भाव र सहकार्य अभिवृद्धि गर्ने पर्व भएको सन्देश दिन खोजेका छन्।