‘बाटुलो जून’ को सुखद् सुरुवात

अनमोल केसीको फिल्म ‘बाटुलो जून’ आजदेखि प्रदर्शनमा आएको छ । फिल्मको सुरुवाती व्यापार निकै उत्साहजनक देखिएको छ । फिल्मले प्रदर्शनको पहिलो दिन नै एक करोड रुपैयाँभन्दा बढी कमाइ गर्ने प्रक्षेपण गरिएको छ ।

अहिलेसम्मको बुकिङ र कमाइको अनुपातलाई हेरेर यस्तो अनुमान गरिएको हो । फिल्म निर्माण टिमले दिएको रिपोर्टअनुसार आज दिउँसो साढे १ बजेसम्म फिल्मले कुल ८३ लाख रुपैयाँ कमाइ गरेको छ । भुवन केसीले निर्माण गरेको यो फिल्मले देशभरका हलमा २६५ शो पाएको छ ।

सामिप्यराज तिमिल्सेना र सरिन पोखरेलको पटकथा रहेको फिल्ममा अनमोल र प्रिन्सीसँगै भुवन केसी, न्यान्सी खड्का, प्रकाश घिमिरे, रेअर राई, दीपक केसी, श्वेता मिश्र, लक्ष्मी गिरी, शारदा गिरी, लक्ष्मीनाथ तिमिल्सिना र शिशिर शिवाकोटीलगायतको अभिनय छ।