सन् २०२६ पनि अहिलेसम्मकै दोस्रो तातो वर्ष बन्ने संकेत, अक्टोबरमा तापक्रमले तोड्यो रेकर्ड

औद्योगिक क्रान्तिअघिको तुलनामा विश्वको औसत तापक्रम १.७५ डिग्री सेल्सियस माथि, लगातार तेस्रो महिना १.५ डिग्रीको सीमा पार । २२ कात्तिक, काठमाडौं । जलवायु परिवर्तनको असर झन् भयावह बन्दै गएको छ । सन् २०२६ को अक्टोबर महिना अहिलेसम्मकै सबैभन्दा गर्म अक्टोबर महिनाका रूपमा रेकर्ड भएको छ ।

यस अवधिमा विश्वको औसत तापक्रम औद्योगिक क्रान्तिअघिको तुलनामा १.७५ डिग्री सेल्सियस बढी मापन गरिएको छ । युरोपेली संघको कोपर्निकस क्लाइमेट चेन्ज सर्भिस (सी३एस) र युरोपियन सेन्टर फर मिडियम रेन्ज वेदर फोरकास्ट्स (ईसीएमडब्ल्यूएफ) का अनुसार लगातार तेस्रो महिना विश्वको सरदर तापक्रमले १.५ डिग्री सेल्सियसको सीमा नाघेको हो । वैज्ञानिकहरूले सन् २०२६ पनि औद्योगिक क्रान्तिअघिको तुलनामा औसत तापक्रम १.५ डिग्रीभन्दा माथि रहने दोस्रो क्यालेन्डर वर्ष बन्न सक्ने अनुमान गरेका छन् । यसअघि सन् २०२४ मा पनि विश्वको औसत तापक्रम यो सीमाभन्दा माथि पुगेको थियो ।

सन् २०२६ को अक्टोबरमा विश्वको औसत तापक्रम १५.३५ डिग्री सेल्सियस पुगेको छ । यो सन् १९९१ देखि २०२० सम्मको अक्टोबर महिनाको औसत तापक्रमभन्दा ०.९० डिग्री बढी हो । यसअघि सन् २०२३ को अक्टोबर सबैभन्दा गर्म महिनाका रूपमा रेकर्ड भएको थियो । तर सन् २०२६ को अक्टोबरले उक्त रेकर्डसमेत तोडेको छ ।