डार्थ भेडरको ऐतिहासिक लाइटसेबरले तोड्यो ‘स्टार वार्स’ का सामग्री लिलामीको विश्व कीर्तिमान

डालास । चर्चित चलचित्र शृङ्खला ‘स्टार वार्स’ का खलनायक डार्थ भेडरले चलाएको ‘ लाइटसेबर ’ बिहीबार अमेरिकाको डालासस्थित एक लिलामी घरमा ४८ लाख ७० हजार अमेरिकी डलरभन्दा बढी मूल्यमा बिक्री भएको छ । हेरिटेज अक्सन्सले उक्त पात्रको ‘प्रमुख द्वन्द्व लाइटसेबर’ भनी वर्णन गरेको यो सामग्री ‘स्टार वार्स’ को इतिहासमै लिलामीमा बिक्री भएको अहिलेसम्मकै सबैभन्दा महँगो सम्झनाको वस्तु बनेको छ ।

यो सामग्री अभिनेता डेभिड प्राउस र उनका स्टन्ट डबल तथा ओलम्पिक फेन्सर बब एन्डरसनले विभिन्न द्वन्द्वका दृश्यहरूमा प्रयोग गरेका थिए । सन् १९८० को चलचित्र ‘द एम्पायर स्ट्राइक्स ब्याक’ मा ल्युक स्काइवाकरसँग क्लाउड सिटीमा भएको प्रसिद्ध द्वन्द्वमा यो हतियार सबैभन्दा बढी चर्चामा आएको थियो । उक्त दृश्यमा डार्थ भेडरले आफ्नो छोराको हात काटिदिएपछि आफू बुबा भएको स्तब्धपूर्ण रहस्य खोल्छन् ।

त्यसको तीन वर्षपछि सन् १९८३ को ‘रिटर्न अफ द जेडाई’ मा सम्राट् पाल्पाटिनको सिंहासन कक्षमा बाबु–छोराबीच भएको भिडन्तमा पनि यही लाइटसेबर प्रयोग गरिएको थियो । सन् १९७७ को पहिलो चलचित्र ‘अ न्यु होप’ मा पनि यो प्रयोग भएको थियो वा थिएन भन्ने पुष्टि गर्न नसकिएको तर प्रयोग भएको ‘सम्भावना’ रहेको लिलामी घरको सूचीमा उल्लेख छ । ४८ लाख ७० हजार डलरको यो मूल्यले ‘स्टार वार्स’ का सामग्री लिलामीको पुरानो कीर्तिमान तोडेको छ ।