फायरिङले पनि रोक्न सकेन टाइगरको रफ्तार, जाह्नवीसँग सकाए ‘लग जा गले’को सुटिङ

बलिउड अभिनेता टाइगर श्रफ केही समयअघि भएको फायरिङ घटनापछि पुनः काममा फर्किएका छन् । उनी अभिनीत आगामी फिल्म ‘लग जा गले’को पुणे सेड्युलको छायांकन पूरा भएको छ । फिल्मकी अभिनेत्री जाह्नवी कपूरले आफ्नो इन्स्टाग्राम स्टोरीमा सुटिङ सकिएको खुसी साटिएको केकको तस्बिर सेयर गरेकी छन् । केकमा ‘एलजेबी पुणे र्‍याप’ लेखिएको छ । त्यसमा धर्मा प्रोडक्सनको नामसमेत देखिन्छ ।

फिल्मको हेयर तथा मेकअप टिमका सदस्यले पनि ‘सुटिङ पूरा भयो’ भन्दै तस्बिर सेयर गरेका थिए । यसअघि टाइगरमाथि मुम्बईको जुहु क्षेत्रमा फायरिङ भएको घटना सार्वजनिक भएको थियो । घटनापछि उनको सुरक्षा र फिल्मको कामलाई लिएर विभिन्न चासो व्यक्त भइरहेका थिए । यही परिस्थितिलाई ध्यानमा राख्दै फिल्म निर्माण टिमले छायांकनस्थलको गोपनीयता कायम राखेको भारतीय सञ्चारमाध्यमले जनाएका छन् । टाइगरको सुरक्षालाई प्राथमिकतामा राख्दै सुटिङको स्थान गोप्य राखिएको बताइएको छ ।

टिमका मुख्य सदस्यबाहेक अरूलाई छायांकनस्थलबारे जानकारी दिइएको थिएन । राज मेहताको निर्देशनमा निर्माण भइरहेको ‘लग जा गले’मा टाइगर श्रफ र जाह्नवी कपूरसँगै लक्ष्य लालवानी मुख्य भूमिकामा छन् । एक्सन विधामा निर्माण भइरहेको यो फिल्मको छायांकन सन् २०२५ को डिसेम्बरमा मुम्बईबाट सुरु भएको थियो । सुरुमा सन् २०२६ मै प्रदर्शन गर्ने तयारी भए पनि छायांकनमा भएको ढिलाइका कारण फिल्मको प्रदर्शन मिति सारिएको हो ।