सडक सञ्जालले सुगम बन्दै पश्चिम सुर्खेत

पश्चिम सुर्खेतका बासिन्दाका लागि वर्षा याम सहज यात्राको मौसम होइन। वर्षायाममा हिलाम्मे सडकको यात्रा जोखिमपूर्ण पनि हुन्छ। बिरामीलाई अस्पताल लैजान होस वा किसानले उत्पादन गरेको कृषि उपज बजारसम्म लैजान, सडककै कारण स्थानीयले वषौंदेखि अनेक सास्ती भोग्दै आएका थिए। तर अहिले यही क्षेत्रको सडक र यातायातको अवस्था बदलिने संकेत देखिन थालेको छ।

बराहताल, पञ्चपुरी र चौकुने क्षेत्रका नागरिकका लागि सडक नहुँदा यात्रा, स्वास्थ्य उपचार, कृषि उत्पादनको बजारीकरण र दैनिक जनजीवनसँग जोडिएको समस्या थियो। सुत्केरी व्यथाले छटपटिएका महिलालाई स्वास्थ्य संस्थासम्म लैजान कठिन हुने, बिरामीलाई समयमै अस्पताल लैजान नसकिने र खोलामा बाढी आएपछि यात्रु घण्टौंसम्म किनारमा रोकिनुपर्ने अवस्था थियो। हिउँदमा धुलो र वर्षायाममा हिलोले सडक यात्रा कष्टकर बनाउँथ्यो। झन्डै ६० किलोमिटरको यात्रा गर्न दिनभर खर्चिनुपर्ने बाध्यता थियो।

सडक पहुँच पुगे पनि बाह्रै महिना सहज यातायात सेवा नपाएका पश्चिम सुर्खेतका नागरिकका लागि अब भने आशा पलाउन थालेको छ। राष्ट्रिय गौरवको मदन भण्डारी राजमार्गअन्तर्गत सडक स्तरोन्नति, कालोपत्रे र पक्की पुल निर्माणका काम अघि बढेपछि वषौंैंदेखिको समस्या समाधान हुने अपेक्षा गरिएको छ।