चिकित्सकको प्रेस्क्रिप्सनबिनै प्रतिजैविक औषधि बेच्ने १३ वटा फार्मेसीलाई कारबाही गरिने

काठमाडौँ : औषधि व्यवस्था विभागले ललितपुरका फार्मेसीमा छड्के अनुगमन गर्दा १३ वटा कम्युनिटी फार्मेसीले चिकित्सकको प्रेस्क्रिप्सनबिना प्रतिजैविक औषधि बेचेको फेला पारेको छ। विभागले ललितपुरका १६ वटा कम्युनिटी फार्मेसीको अनुगमन गरेको थियो।

औषधि व्यवस्था विभागका महानिर्देशक भरत भट्टराईले ललितपुरका १६ वटा कम्युनिटी फार्मेसीको अनुगमन गर्दा १३ वटामा एन्टिबायोटिक औषधि बेचेको पाइएको बताए। “ललितपुरका १६ वटा फार्मेसीमा अनुगमन गर्दा प्रतिजैविक औषधिको दुरुपयोग हुने गरेको देखिन्छ”, उनले भने, “सोह्रवटा कम्युनिटी फार्मेसीमध्ये १३ वटा फार्मेसीले चिकित्सकको प्रेस्क्रिप्सनबिना एन्टिबायोटिक ओभर द काउन्टर गरिरहेको पाइएको छ।

” यसरी बिनाप्रेस्क्रिप्सन एन्टिबायोटिक बेच्ने फार्मेसीमा महालक्ष्मी–१ स्थित अन्विका फार्मेसी, भर्टेक्स फार्मेसी, इजी फार्मेसी रहेका छन्। यसैगरी ललितपुर महानगरपालिका–१५ स्थित विश्वास फार्मेसी, ललितपुर महानगरपालिका–२, ३, ४ र ७ मा रहेका केही फार्मेसी पनि रहेका छन्।