तिहार मैझारोमा झरी : अनि खुले जुगलदेखि माछापुच्छ्रेसम्म (तस्बिरहरू)

तिहार मैझारोसँगै आएको झरी रोकिएपछि उत्तरी हिमशृङ्खला खुलेका छन् । भाइटीका सकिँदै गर्दा बुधबार दिउँसो परेको वर्षाले मौसम नुहाएपछि नुवाकोटबाट माछापुच्छ्रेदेखि जुगल हिमाल खुलस्त देखिए । ‎‎२५ कात्तिक, नुवाकोट । तिहार मैझारोसँगै आएको झरी रोकिएपछि उत्तरी हिमशृङ्खला खुलेका छन् ।

भाइटीका सकिँदै गर्दा बुधबार दिउँसो परेको झरीले मौसम नुहाएपछि नुवाकोटबाट माछापुच्छ्रेदेखि जुगल हिमाल खुलस्त देखिए । मौसम खुलेसँगै नुवाकोटका ककनी, शिवपुरी र बेलकोटगढीको बाघखोरबाट सेताम्मे हिमालका सुन्दर दृश्य हेर्नलायक थिए । नेपालका हिमालहरूसँगै चीनको केरुङसम्मका हिमदृश्य यहाँबाट अवलोकन गर्न सकिन्छ । नुवाकोटबाट नेपालका जुगल हिमाल, गणेश हिमाल, हिमालचुली, लाङटाङका साथै ८ हजार १ सय ५६ मिटर अग्लो मनास्लु र माछापुच्छ्रेसम्म हेर्न सकिन्छ ।

यस अतिरिक्त काठमाडौं उपत्यकाबाट पनि हेर्न सकिने दोर्जे लाक्पा, फुर्बी ग्याल्त्सो र गौरीशंकरजस्ता हिमाल पनि नुवाकोटबाट प्रस्टै देखिन्छन् । ‎दसैँपछि तुँवालोले मौसम धुमिल बनाएपछि केही दिन हिमाल देख्न पाइएको थिएन । तर, भाइटीकाको दिन परेको झरीले तिहारको बिदाइलाई रोमाञ्चक बनाएको छ ।