युवा केन्द्रीय सदस्यलाई डिजिटल अभियानदेखि पालिकासम्म परिचालन गर्दै कांग्रेस

सभापति गगनकुमार थापा, पदाधिकारी तथा युवा केन्द्रीय सदस्यबीच युवाको भूमिका, सामाजिक सञ्जालको उपयोग, सूचना प्रवाह र जनतासँगको सम्बन्ध विस्तारबारे छलफल भएको बैठकमा सहभागी केन्द्रीय सदस्यहरूले बताएका छन् । १८ कात्तिक, काठमाडौं । नेपाली कांग्रेसले पार्टीको संगठनात्मक गतिविधि र राजनीतिक सन्देशलाई प्रभावकारी बनाउन युवा केन्द्रीय सदस्यलाई डिजिटल अभियानदेखि स्थानीय तहसम्म पुगेर संगठन विस्तार र जनतासँग सम्बन्ध जोड्ने जिम्मेवारी दिने रणनीति अघि सारेको छ ।

पार्टी केन्द्रीय कार्यालय सानेपामा बिहीबार ३५ वर्षमुनिका र सामाजिक सञ्जालमा प्रभाव बनाएका युवा केन्द्रीय सदस्यहरूको बैठकमा यसबारे छलफल भएको छ । सभापति गगनकुमार थापा, पदाधिकारी तथा युवा केन्द्रीय सदस्यबीच युवाको भूमिका, सामाजिक सञ्जालको उपयोग, सूचना प्रवाह र जनतासँगको सम्बन्ध विस्तारबारे छलफल भएको बैठकमा सहभागी केन्द्रीय सदस्यहरूले बताएका छन् । महामन्त्री प्रदीप पौडेलको नेतृत्वमा भएको छलफलमा ३५ वर्षमुनिका युवा केन्द्रीय सदस्यसँगै अन्य केन्द्रीय सदस्यले पनि पार्टीलाई नयाँ ढंगले अघि बढाउने उपायबारे सुझाव दिएका छन् ।

छलफलमा सभापति थापाले परम्परागत शैलीबाट मात्रै पार्टीको सन्देश जनतासम्म पुर्‍याउन नसकिने भन्दै नयाँ पुस्ताको सोच, प्रविधि र सिर्जनात्मक क्षमताको उपयोग गर्नुपर्ने धारणा राखेका छन् ।